Отырысты ашқан Қазақстан Республикасының Ұлттық Паралимпиада комитетінің президенті Қайрат Боранбаев спорт маусымының аралық қорытындыларын шығарып, қазақстандық пара спортшылардың халықаралық аренадағы жетістіктерін атап өтті.
«Жуырда ғана Миланда өткен қысқы Паралимпиада ойындарында ұлттық құрамамыз лайықты өнер көрсетті. Бүгін арамызда алтын медаль жеңіп алған Паралимпиада чемпионы Ербол Хамитов отыр. Сондай-ақ АҚШ-та өткен беделді халықаралық турнирде жеңіске жеткен блайнд-футбол командасын да атап өткім келеді. Барлық спортшыларға, жаттықтырушыларға және федерацияларға атқарған жұмыстары үшін ерекше алғысымды білдіремін», - деді Қайрат Боранбаев.
ҚР ҰПК президенті сондай-ақ биылғы жылдың басты жарыстарының бірі 2026 жылғы 18-24 қазан аралығында Жапонияның Нагоя қаласында өтетін Азия Пара ойындары болатынын атап өтті. Ол ұлттық құраманың дайындығы қазірдің өзінде жүргізіліп жатқанын және Қазақстанның 12 спорт түрінен қатысуды жоспарлап отырғанын айтты.
Күн тәртібі аясында қатысушылар Ұлттық Паралимпиада комитетінің басшы органдарының қызметіне қатысты мәселелерді қарады. Дауыс беру қорытындысы бойынша Қазақстан Республикасы Туризм және спорт министрлігі Спорт және дене шынықтыру істері комитетінің төрағасы Есеналин Руслан Бақыттыулы ҚР ҰПК Вице-президенті және Атқарушы комитетінің мүшесі болып сайланды.
Отырыс қорытындысы бойынша Қазақстан Республикасының Ұлттық Паралимпиада комитетінің басқару жүйесі мен қызметін одан әрі жетілдіруге бағытталған күн тәртібіндегі барлық мәселелер қабылданды.